喺周日克羅地亞贏土耳其1:0嘅歐國盃，「格仔軍團」隊長達里祖史拉有球靚罰球中楣，相信史拉喺天上嘅爸爸亦會為佢惋惜。就喺克羅地亞贏波後，34歲嘅史拉收到嚟自家鄉嘅噩耗，佢爸爸啱啱過咗身。國家隊亦好體貼，唔單止畀佢禮拜一即刻回國奔喪，仲冇定佢嘅歸隊日期，總之史拉處理好喪事，覺得心情平伏咗先返嚟；國家隊仲透過instagram向隊長一家送上慰問。克羅地亞下場會喺周五對捷克。