秘魯喺美洲盃使出上帝之手，將堂堂巴西（圖）踢出局，究竟我求大俠要唔要為巴西呼冤呢？其實，我求大俠覺得巴西出局一啲都唔冤枉，呢屆踢得咁差，搵埋啲中超護級球隊球員踢正選，抵佢有咁嘅下場，最好順手踢埋教練鄧加落台。可惜，鄧加嘅厚顏程度真係高到有潛質嚟香港做局長，佢話冇驚過被炒喎。
巴西呢隊真係衰波，你以為佢掂，佢就衰畀你睇！喺B組首場分組賽，佢哋對厄瓜多爾只踢成0:0，但之後對魚腩海地就迴光反照，大勝對手7:1。以為佢哋漸入佳境，原來真相係巴西只識欺善怕惡。
秘魯厄軍攜手入八強
當地禮拜日，巴西對住實力勁過海地、但牌面仲差巴西成班波嘅秘魯，諗住佢哋贏得到，點知踢咗成場都攻唔入，仲喺75分鐘失波。秘魯嘅安迪普路傳中，雷迪亞斯門前用手撞入，為佢哋鎖定勝局。全靠呢個「上帝之手」入波，秘魯贏1:0，以七分獲小組首名，同五分嘅厄瓜多爾一齊晉身八強；至於巴西只得四分排第三出局。
雷迪亞斯呢個手球入波真係幾清楚，唔使慢鏡都睇得到，除非你話佢隻手係佢隻腳嘅伸延啦！巴西球員紛紛圍住球證投訴，但球證同旁證商量完之後，都覺得入波嗰隻唔係手嚟嘅，判入球有效。巴西呢個入波係冤枉，但巴西出局就絕對係抵死！
厚顏鄧加唔怕被炒
堂堂巴西剩係識對海地刷入波，連對秘魯同厄瓜多爾都食白果！巴西自1989年起連續11屆分組賽出線，仲拎過五屆冠軍，點知今屆淪落到咁，教練鄧加係咪應該要問責下台先！鄧加選人真係幾有問題，正選中堅基爾拿斯文圖踢緊山東魯能，而魯能係排緊中超包尾！當記者問佢驚唔驚被炒，鄧加仲好有霸氣嘅話：「我剩係怕死，唔怕被炒。足協主席知道我哋做緊咩同做成點，亦知道我哋嘅壓力。」睇鄧加係咁講「我哋」，唔通佢覺得呢個係大家嘅責任，所以就冇人要負責？
