華華噚日食晏時間行經太古城，赫然發現有位幾靚仔嘅洋人，佢唔算高大，但幾似憑荷里活電影《超人》成名嘅基斯杜化李夫（Christopher Reeve），再望清楚，佢其實係太古地產（1972）旗下太古城中心嘅商場總經理鮑麒麟（Kieran Bowers）。
商場最近擺咗好多適合小朋友嘅遊戲攤位，見鮑麒麟一個人拎住部手機，喺攤位中穿梭兼拍照，似係想影低有幾多人參與有關活動，佢左穿右插，轉眼就閃走咗。
都啱嘅，42歲嘅鮑麒麟舊年先至調去管理太古城商場，當然要勤力啲巡場，諗計搞旺個場之餘，又要不停睇吓有冇成效，有成績先至有機會升職吖嘛，佢又唔係做明星，齋靠個樣唔得㗎喎。