【ViuTV專訪】實況娛樂情侶真人騷《慳D啦Honey》最近在ViuTV熱播，沒有安排人生導師、配對專家，只是把四對情侶的日常生活呈現，令最喜歡食花生的香港人，無不大呼過癮。四對情侶分別是同樣愛跳舞的健健與Rachel、曾經一齊浪遊的阿文及Pan Pan、經營性商店的Picco和Vera，以及任職金融界的羅啟聰（Edwin）及Crushy。日前他們在銅鑼灣接受專訪，鏡頭前後都粗口橫飛，決定唔扮嘢做回自己。
Edwin晒密照闢謠
節目甫出街，阿文與Edwin已被質疑造假，Edwin原來兼任模特兒，被指與Crushy是假情侶。Edwin大方分享與Crushy的素顏親密照：「好多剪接咗，大家睇唔到，如果我哋唔係情侶冇可能一齊捱到呢十日。」報稱無業的浪遊人阿文，被爆是ViuTV導演，太太則是無綫員工，面對質疑，他無畏無懼：「其實我唔係導演，只係一個監製仔。玩嘅時候冇嘢撈吖嘛，後來公司請人，機緣巧合咪加入咗囉。」經常被網友起底，為何仍要參加？阿文、Edwin和健健異口同聲謂是為了10萬元獎金，亦不怕被爆料。反而愛妻號Picco說：「為咗個美好回憶，想第時可以同個女講番。」
節目中，他們對另一半態度被公諸於世，Rachel揼釘受傷，男友健健竟說輸比賽更「肉痛」。Picco與Vera為健健平反，爆每日只有8分鐘洗澡，如超時便要扣錢，健健寧願外出沖涼，讓更多時間給女友，健健解釋：「Rachel天生頭髮好厚，8分鐘真係冇可能，於是我出去用隻狗飲水嘅地方沖。」看似嬉皮笑臉的健健，其實亦很細心。不過，眾人同聲埋怨居住環境差，Vera說：「我瞓瞓吓，突然有隻田雞喺身邊！」
齊怨居住環境差
眾人拍罷節目都有所得着，阿文說：「至少我冇離婚，以前身邊好多人覺得我對老婆唔好，睇完我都覺得有改善空間，仲特登紋咗個P字。」Picco與Vera將榮升父母，懷孕4個月的Vera直言與丈夫感情有增進。連擔心健健與前女友翻撻的Rachel亦說：「信心大咗，雖然佢成日喺節目度媾女，仲寫情信畀人㖭。」
至於Edwin雖然仍未帶Crushy見家長，他坦言不會因外界的看法改變自己：「好多人問我點頂得順Crushy，其實我有啲嘢仲怪，我好執着、好多麻煩嘢，但𠵱家冇咁激烈，會講個問題出嚟。」
採訪：盧妹
場地：Blackroom
