【大坑】十優港姐麥明詩（Louisa）的律師男友林作，日前疑背女友作反向低胸索女「抄牌」，全程被本報讀者直擊踢爆後，麥明詩回覆：「關係講信任，要贒住嘅話冇意思。」林作在社交網留言：「大鑊！」似乎知道已觸動女友神經！
前晚7時許，本報發現林作又約女在大坑撐枱腳，幸好今次約會對象是母親大人林媽媽。
面對美食冇胃口
他們穿上白色母子裝打邊爐，林作全晚表現悶悶不樂，雖然全枱擺滿美食，但他都很少動筷，反而林媽媽就胃口大開，還邊食邊講不停，似乎是對仔訓話，平日口若懸河的林作，面對母親大人的訓示，他只能乖乖地說：「係」、「知道」、「聽到」。其間林作還不停篤手機，未知是否向女友稟報。
飯後兩母子行去取車，其間林媽媽繼續「哦仔」，林作表現得無厘神氣，之後他駕車接載母親到中環。事後《蘋果》致電林作，他承認自己心情不好：「真係好愁，成件事係誤會。嗰日真係一大班人，只係咁啱我同個女仔行開咗，但只係喺側邊企啫，好冤枉，而且我真係冇抄牌。」
林媽媽是否向他訓話？林作坦白說：「係呀，都愁嘅。」問到是否未搵到麥明詩？林作無奈地說：「係，仲未搵到Louisa，可能佢好忙。」
背熟錫老婆金句
不過林作解釋打邊爐期間篤手機，並不是瘋狂WhatsApp女友：「當時係碌緊facebook，見友人share『男人該怎樣疼老婆』呢個post，第一項已經係『在她朋友面前要表現得比平常更疼她』，自己背熟晒十條金句。」
林作跟麥明詩拍拖兩年多，林媽媽已視她為準新抱，早前更豪擲6,500萬買入麥當勞道複式豪宅，準備兩口子新婚之用。現在林媽媽為準新抱出頭教訓囝囝，不知麥明詩會否原諒男友呢！
採訪、攝影：徐錦池、畢紹基
