有時八方真係幾嬲立法會主席曾鈺成㗎，每個星期都喺報章專欄發表意有所指嘅文章，次次都花盡心思，叫大家估下有乜意思，噚日又有唔少人被考起。
曾主席喺專欄拋下燈謎「寬掌彩綢，無財暗卜」，話係下屆特首選舉嘅玄機，全城苦苦思量到底係乜？有人從自覺篤定連任嘅CY思維去諗，唔通志在必得？抑或疾風勁草？莫非係，超然地位？統統都錯。
其實曾主席都有提供拆解方法，就係呢個謎底係一個四字詞語，而每個字可以左右拆開，拆成兩個字，合共8個字，而呢8個字嘅同義字就係呢次謎面嘞。
八方發現唔少網民都同曾主席一樣咁高水平，知道謎底就係港人心聲：拒絕欽點。唔知曾主席係咪同大家同一陣線？