喺壹傳媒集團過咗22年光景嘅《蘋果日報》榮休社長、印刷媒體行政總裁「堅哥」葉一堅，轉任集團董事局非執董、壹傳媒董事局非執行主席與台灣《蘋果日報》主席，上星期台灣《蘋果》已經賀堅哥榮休，今個星期就輪到香港《蘋果》賀堅哥，仲有特別嘉賓出席㖭噃！
唱《友誼之光》眼濕濕
港蘋噚日為堅哥搞咗個party，新任集團出版媒體行政總裁、香港《蘋果》社長張劍虹、總編輯陳沛敏等高層都有出席，而成班《蘋果》、《壹週刊》同事亦齊齊賀堅哥榮休，百幾人逼爆大樓。
堅哥榮休咁高興，梗係要有神秘嘉賓，好多人知堅哥當年「心頭好」係做拱橋嘅彭丹，《蘋果》同事就特別請咗「彭丹」到場，但呢個「彭丹」肥咗少少、亦man咗少少，但堅哥一啲唔介意，照俾A貨彭丹攬住錫。
切蛋糕之前，梗係問吓堅哥有乜感言？佢話喺壹傳媒做咗22年，當日入壹傳媒時候，當時仲係《壹週刊》高層嘅張社長已經同佢講，做高層最後要諗點樣優雅退下，堅哥話見到咁多同事祝賀佢，都幾優雅！
一班同事之後排隊同堅哥合唱《友誼之光》，堅哥感動到眼濕濕，仲有好多人排隊搵佢集郵，叫堅哥得閒返公司探吓大家，場面開心又感人。
李八方
mailto:[email protected]