在銅鑼灣東來順吃午飯後，坐地鐵返回中環，在時代廣場附近碰到零售界老闆W先生，佢居然劈頭第一句就問：「你周圍行走，有冇聽到邊個會挑戰CY？」咦，W先生雖然唔係資深梁粉，上次競選時都叫做不挺唐，傾向支持CY嘅噃，當時佢話CY夠勤力，肯做事吖嘛，點解四年後有啲傾向，不希望CY連任？W先生解釋：「講真，CY係好勤力，但冇乜用啫，香港依家搞成咁，呢條街（羅素街）都靜晒咯，生意好難做，CY退隱可能對香港仲好！」退隱呀？難啲咯，世界上冇一個領導人染上權力癮之後，肯100%真正自願放棄嘅，何況CY！至於有冇人出來競選，目前好難講，表面上睇，曾財爺與好打得都似乎動作多多，似乎預備一旦收到關注的眼神就會入閘挑戰上司。但關愛的眼神目前在哪裏？冇人知道，有消息人士講，等待上帝的旨意嘅松哥，九成九唔會參選，因此曾先生與林太會係僅存嘅挑戰者。是否可以挑戰成功，不在於本港選委，既然無特首直選，香港市民無話事權，選委都係聽北京旨意投票嘅啫。
是否支持／反對CY連任，原來係競選立法會議員嘅主要因素，中央政策組秘密民調有問：「你投票揀候選人嘅時候，對於候選人支唔支持梁振英連任，係唔係你嘅重要考慮因素呢？」結果32%人士答「幾重要」，25%答「非常重要」，答「唔係幾重要」或「完全不重要」嘅有39%，呢個調查結果幾有啟發性，譬如港島區有六個議席，競選時如選民問工聯會郭偉強、民建聯張國鈞：「你支唔支持梁振英連任？」到時郭、張兩位點樣答？唔通會夠膽大聲講：「支持」？相反，王維基、詹培忠就一定會大聲答：「ABC」（Anyone but CY），咁就得米咯。一位公關界高層前幾日同左丁山提起，佢睇過一份政黨民調港島區立法會參選人嘅支持度，就正正係王維基領先排第一，工聯會郭偉強大墮後包尾，如果民調無誤，王維基肯定當選，郭偉強肯定落選。左丁山反駁：「工聯會有辦法扭轉民調嘅，北角區福建幫邊會唔聽話投票吖！」公關C話：「你或者冇講錯，但掌舵人配票時要同時兼顧工聯會及民建聯，係高難度動作。」今年立法會直選，可能係對CY民望嘅大挑戰，如堅定保皇黨民建聯工聯會參選人在直選／超級區議會議席選舉紛紛落敗嘅話，中央面色會好難睇，因為可能歸咎CY累街坊也。若然如此，9月選舉之後跑馬仔選特首可能會有大變局！