正當標準工時踏入第二輪諮詢，新任總商會主席、九倉（004）主席吳天海就提出一個幾啱聽嘅講法。佢最近接受《工商月刊》訪問時提到，標準工時係舊經濟時代嘅產物，喺新經濟下，年輕人都希望根據個人需要去決定工時，唔鍾意朝九晚五工作，咁點解仲要限制佢哋嘅工時呢？
吳天海呢個講法的確好啱聽，唔知佢又怕唔怕，佢嘅同事知道佢咁講之後，個個自動採取彈性上班時間呢。不過又咁講，𠵱家人人有部智能手機，上司晚上WhatsApp問你嘢，你夠唔夠膽第二朝先覆吖？
吳天海亦有提到政府施政，佢冇講邊個做特首好，只係建議特首盡量唔好干預商界事務，要畀自由市場自行運作，若然要透過干預去糾正短期問題，亦應該盡快放手，以免造成永久損害。擔任總商會主席後，佢希望可以拉近番商界與公眾嘅距離咁話。