有時八方真係幾嬲立法會主席曾鈺成㗎，每個星期都喺報章專欄發表意有所指嘅文章，可能覺得畫公仔畫出腸唔夠層次，亦或者藉此避免一啲麻煩事，次次都花盡心思，叫大家估下有乜意思，搞到逢周一後復工嘅打工仔，未開工已經筋疲力盡咯!
好似尋日，又有唔少人被考起，當然包括八方在內，一朝早睇到曾主席拋下燈謎：「寬掌彩綢，無財暗卜」，就係下屆特首選舉嘅玄機，一直苦苦思量到底係乜？
最簡單梗係從自覺篤定連任嘅CY思維去諗，唔通志在必得？抑或疾風勁草？莫非係，超然地位？錯，統統都錯。其實曾主席有畀到拆解方法，就係呢個謎底係一個四字辭語，而每個字可以左右拆開，拆成兩個字，合共八個字，而呢八個字嘅同義字就係呢次個謎面。
八方才疏學淺，最初都諗唔到，卻勝在朋友多，而且唔係現屆班子水平，最終獲高人指點，然後有咗答案，原來係唔少港人心聲。到底係乜？八方都畀貼士大家估下，嗱，最近有傳CY篤定獲北京支持連任，但唔少特首小圈子選委會成員，私下紛紛話想向阿爺SAY NO，而港人就更加對阿爺話事好反感。謎底嘅四粒字，正正講出呢個態度，唔知又係咪代表曾主席嘅心聲呢？
●相信聰明嘅八方讀者都估到，謎底係「拒絕欽點」，係咪覺得，曾鈺成好識呃LIKE呢?