巴西喺美洲盃出局，唔知教練鄧加有冇後悔冇徵召尼馬入伍。講番尼馬，有關佢當日轉會去巴塞隆拿，球會涉嫌瞞稅一案喺上周五審結，巴塞被判罪名成立，現任主席巴圖美奧同埋前主席羅素或要入獄。不過喺西班牙逃稅係可以用錢解決，只要向稅務部繳交500萬歐元（約4,400萬港元），兩位就唔係坐花廳。另外日前傳出法甲巴黎聖日耳門想斟尼馬，仲開出年薪5,000萬歐元咁誇張嘅條件，尼馬隨即暫停同巴塞傾續約。