沙加兄弟上周六喺歐國盃A組分組賽對決，佢哋媽媽艾美絲都有入場幫兩個仔打氣。由於哥哥杜倫沙加代表阿爾巴尼亞，細佬格列沙加（小圖）就代表瑞士，為免偏心，艾美絲着咗件一邊係阿爾巴尼亞、一邊係瑞士嘅T恤，一次過幫哥哥同細佬打氣。啱啱加盟阿仙奴嘅格列沙加話，哥哥同佢會將喺足球搵到嘅八成收入上繳畀屋企。佢話：「我哋太後生，唔識理財。屋企人先係我哋最重要嘅資產。」咁孝順，艾美絲梗係兩個都錫晒啦！
