輸波搞到心情變差，點算好？喺今個月頭法網屈居亞軍嘅「細威」莎蓮娜就話你知，只要見到靚仔就可以即刻開心番晒！佢近日喺泳池派對嗰陣，野生捕獲喺美國度假嘅巴西球星尼馬，仲忍唔住同佢合照，兼放上社交網站晒命㖭。
一向係party animal嘅「細威」，最近就以一件頭黑色泳衣出席泳池派對，仲撞到喺美國度緊假嘅尼馬；兩位咁鍾意玩社交網站嘅人碰頭，當然唔少得合照留念啦。「細威」仲喺instagram晒命咁話：「隨時都要準備好，你唔知尼馬幾時會出現！」晒命完畢，「細威」有好嘢都會同粉絲分享嘅，佢喺snapchat同尼馬錄咗條片，赤裸上身嘅尼馬就大派飛吻冧粉絲。
咪睇「細威」同尼馬合照嗰陣笑得咁開心，就以為之前法網失利對呢位美國一姐冇影響呀。其實佢早前喺twitter上載咗條片，坦承自己喺法網女單決賽輸咗畀梅古露莎之後勁嬲：「老實講，我覺得自己喺嗰場比賽可以打得更好，我真係好嬲，嬲到掟爛晒所有球拍。當時我覺得自己打得咁差嘅話，可能以後都唔需要網球拍。」
鄭賽賽「雙料」出局
好彩有尼馬𠱁番「細威」開心咋，如果唔係都唔知點算。唔知中國嘅鄭賽賽有冇咁好彩有人𠱁番呢？佢喺上周六諾定咸網賽女單四強，以直落兩盤不敵美國球手莉絲姬，加上佢喺早前舉行嘅女雙八強輸波，好無奈咁「雙料」出局。