大摩剛周日冇馬贏，沙田賽事長勝紀錄告一段落。這天他亦原本都冇乜料到，直至第九場三班1000米直路賽「宇宙車神」出場，局面即刻唔同晒。
「宇宙車神」前仗由貝湯美贏同程直路賽開齋，上仗再出換雷神卻大熱倒灶，呢鋪改由潘頓發揮，開跑時都係大熱門並有3.6倍獨贏。結果來自澳洲的「宇宙車神」以無敵姿態沿住外欄一條氣放返嚟，再以神級速度大勝逾三身位而回，組合獨贏開A1派22元。潘頓昨日(11日)在澳洲贏兩場級際賽，這天則在沙田憑「可人兒」、「慣勝聆聽」、「宇宙車神」大帽子戲法，個人旺氣由澳洲帶返嚟香港。
「宇宙車神」由功夫巨星甄子丹同佢老襟蔡加讚聯名擁有，此駒前次開齋唔見兩人拉頭馬，這天情況一樣，賽後只見蔡加讚太太汪圓圓在雨中身穿短褲大晒白滑美腿代拉頭馬。
今場「宇宙車神」贏到離行離列，二至四名反而爭得激烈，結果「皇龍大將」、「醒蹄飛」和曾志偉的團體馬「卡加動力」順序跑入二至四名，四重彩派四萬二千幾。