大記者到港島公幹，叫左丁山如果有空就同佢一齊吃午飯。剛啱呢日有約會取消，對方話老闆臨時有要事吩咐，佢唔敢出街，要靜靜思考如何執行老闆命令喎。咁就精啲，今時今日，越係高層，就越要聽老闆點，基層員工話走就走啫，貴為董事級數之人，高薪厚職，咁容易搵得番呀，唔諗自己，都要諗吓仔女要讀國際學校。
左丁山於是叫董事M以公事為先，食午餐為次，下個月再約過。跟住打電話問大記者去邊度食飯，佢話東來順，左丁山吓一聲：「叫我去尖東帝苑酒店？遠啲喎，唔去嘞。」大記者急急回應：「銅鑼灣東來順呀，登龍街金朝陽中心二期26樓，近時代廣場，羅素街後面！」銅鑼灣幾時開咗間東來順？此乃北京老牌食肆，冬天吃涮羊肉就正嘞，夏天有乜好食？
大記者原來係此店熟客，人人認得佢。佢話呢間北京菜／淮揚菜午市特平，好啱佢，故此近來一口氣幫襯過三四次。睇吓菜式，嘩，午市套餐（一人前）只售98元，平過去雲咸街中午食意大利餐（$118~$128），分分鐘便宜過翠華㖭，午餐有京式拼盤任選一款，包點任選一款，加甜品（豌豆黃），包茶芥及加一服務費；譬如食一碗擔擔麵加雞肉小籠包兩件，再來豌豆黃，OL夠食嘞啩。
大記者話請，當然唔同佢食午市套餐，選點心啦，有三四十款，最平36元（三隻小籠包），最貴三絲炒年糕（108），再望吓商務套餐，四位用，收348元，6月19日父親節十二位用套餐都只係收2680。左丁山落到銅鑼灣，一於整蠱大記者，唔食甚麼套餐咯，叫下蒙古羊架、葱烤羊肉薄餅、擔擔麵、煙薰桂花魚，甜品叫荔枝玫瑰凍糕、淮山紅棗合桃糕，呢啲係平時在其他淮揚飯店少食得到嘅，味道用料一流，呢餐食得幾過癮，於是起身周圍望吓環境，出面有個大露台，可望到部份維港景，但最啱用嘅怕係吸煙人士嘞，露台擺咗四五張六人枱，秋天在此飲杯白酒，食番口煙（左丁山非吸煙人士），唔駛走落街，咪幾正？大記者話：「係囉，記者編輯特別係仁哥嗰類，實鍾意，前些時同燦哥嚟，食完飯佢咪出露台吸煙囉，唔駛落樓下企街食煙。」講起仁哥，據悉佢已從ICU返回普通病房，算係有驚無險，朋友戥佢高興。呢間東來順遵守清真規條，不賣豬肉，羊肉則由蒙古牧場直送，零舍與別不同，係邊個開嘅呢？大記者話老闆就係郭先生，經常從新鴻基中心走過來食，直情係佢飯堂。哦，郭大少咁有銀，開間靚食店收平啲，冇所謂嘞。