容祖兒同劉浩龍（師兄）近日戀情似乎多咗曝光，繼日前獨家授權李克勤發相後，師兄前日出席活動時仲放聲氣話陪埋女友過生日先去馬來西亞開工拍戲，前日「師祖」到跑馬地撐枱腳時，氣氛卻很不一樣。
前日下晝3點幾，師兄駕車載祖兒現身跑馬地，佢兜咗兩個圈後，疑似搵唔到車位，於是泊喺毓秀街，之後急步行去司機位隔籬個乘客位——即係祖兒個座位度，開定遮接女友落車，免得對方淋雨。
戴住黑超嘅祖兒落車後，一度想幫師兄攞遮，不過兩人最後都係保持距離。只見祖兒雙手插袋行，師兄為其打傘，兩人急步行去隔籬嘅景光街正斗食麵，食咗45分鐘左右，就沿路回程上車走。平日好鬼精靈活潑嘅祖兒，當日全程悶悶不樂，應是與其親密戰友兼化妝師Arris離世有關。