企喺高人隔籬，有時都會膽怯㗎，勞工及福利局局長張建宗最近就有切身感受。佢喺網誌笑言，上星期喺香港特殊奧運會40周年啟動禮，遇到專程來港主禮嘅國際特殊奧林匹克大使、退役NBA籃球明星姚明，雖然對方退役後多次來港，但自己第一次同呢位高人見面。嘩，真係覺得「高不可攀」。
肥仔張有此感覺又唔特別，皆因姚明身高兩米29，而肥仔張呢，官方冇公佈喎，肉眼睇落身形差姚明成截！之但係人高又唔代表高傲，肥仔張話姚明較佢想像中溫文，感受到對方心中有團熱火，希望藉住成立慈善基金同擔任特奧會形象大使，鼓勵智障人士展現自我，建立自信及擴闊社交圈子。
佢仲引述姚明話，研究顯示曾經參與運動嘅弱能人士，由於人際技巧較高，搵工時受聘機會亦較高。