資深音樂人盧冠廷一連兩晚在紅館舉行「Beyond Imagination」演唱會，前晚尾場，他邀請了劉德華做嘉賓。陳慧嫻、杜德偉、卓韻芝、徐小鳳、蔡一傑、蔡一智、蘇施黃、蘇玉華及男友潘燦良等來睇騷外，還有近日跟李麗珍甩拖的潘源良，但他顯得木無表情。
鬼馬擺甫
盧冠廷大爆華仔將第一次作詞獻給他，華仔解釋：「我第一次寫歌，嗰時好多歌手寫歌畀人唱，我就攞咗佢（盧冠廷）首歌，寫咗《如果你是我的傳說》，你哋知唔知幾多年呀？放心，我哋都唔知。」盧冠廷表示恨與華仔合唱這首歌：「佢真係唱得好過我，所以我會畀晒佢唱。」
之後，盧冠廷還大爆上次賑災演出跟華仔傾偈，對方謂震到香港，華仔說：「上次未有後代，有咗後代唔會講呢啲嘢！」盧冠廷即問：「你乜意思呀？生咗出嚟死晒唔緊要呀？」華仔解畫：「嗰時走就大家一齊走，如果有（後代），就畀佢哋開開心心，唔好講呢啲衰嘢！」
華仔唱出《如果你是我的傳說》時擺出鬼馬甫士，盧冠廷聽完後大讚：「經典嘅歌曲，經典嘅聲音，多謝你。」華仔笑言：「香港係每日都有好多煩憂，我哋一定要有個清泉，繼續每年都開，盧盧，只要你每年都開，我每年都嚟。」觀眾反應熱烈。
驚訝有女
盧冠廷結尾唱了經典金曲《陪著你走》，觀眾high爆和唱，他唱完更攬着太太唐書琛致謝：「佢好恨我多謝佢，應該嘅，我成日都唔記得，好多嘢喺身邊唔值錢，冇咗嗰時就知死！」
完騷後盧冠廷接受訪問，提到升呢做人父的華仔在台上發表的地震論，盧冠廷竟烏龍地不知華仔已有一女，他說：「唔怪之得啦，阿Lam（林子祥）有一件出嚟都變晒，愛心真係湧晒出嚟！」問到演唱會上大唱《最愛是誰》，不怕令失戀的潘源良觸景傷情嗎？他說：「佢都習慣啦，唱呢首歌，反而我傷心、傷感啲囉！」
採訪：盧妹 攝影：仇志德