丹麥靚女網球手禾施妮雅琪奧運夢碎！國際網球聯會（ITF）上周六宣佈，禾琪喺四月因傷退出聯會盃，搞到喺倫敦奧運至里約熱內盧奧運期間，無法為國家出戰兩次聯會盃，所以唔符合出戰奧運嘅資格；據悉，禾琪同丹麥網協決定上訴。同時，「泥地王」拿度亦面臨相同危機，假如佢因為手腕傷而退出七月舉行嘅西班牙對羅馬尼亞台維斯盃賽事，將會唔符合ITF嘅出戰奧運條件。30歲嘅拿度喺2008年北京奧運贏得男單金牌，但上屆倫奧就因傷退賽。