如果要由洛杉磯去「賭城」拉斯維加斯，我會揀最old school嘅交通方式灰狗巴士。咩話？最少搭7、8粒鐘，又攰又悶。作為土生土長嘅港孩，冇乜機會搭超過兩粒鐘嘅巴士，除非遇上大塞車或者入機場。好似中美合建高鐵喎，「多謝晒，我都係會揀坐灰狗巴士。如果想快，咪坐飛機囉」。唔係無謂嘅堅持，大人，命仔要緊呀。
中美兩國說好了合作建設洛杉磯至拉斯維加斯嘅高鐵項目，突然被美國西部快線公司終止。原因？中國鐵路安全未達到安全營運標準。社會建設應該由人出發，方便民眾生活為本。中美合建高鐵項目撻Q，美方反口話罷買，出爾反爾。中方四個字回應：「不負責任」。你可以話美帝野蠻，零誠信可言，簽訂框架條約都可以違反。但如果由乘客安全出發，美國罷買有理。
其實中美兩國進出口貿易密切，彭博統計數據指2015年美國九成10大進口商品都來自中國，包括：一、筆電（總額371億美元）；二、電視遊戲機（總額47.4億美元）；三、聖誕裝飾品（總額20.5億美元）；四、塑膠boots（總額14.7億美元）及五、吊扇（總額12.7億美元）。
睇返首5項物品，已經圍繞住美國人日常生活，仲未計去年總值407億美元、由中國進口嘅手機， 例如喺深圳組裝嘅iPhone，美國應比任何一個地方更怕失去中國市場。而美國總統共和黨參選人特朗普話，如當選會對中國關稅提高至45%，屆時影響中國對美國進口，唔好話iPhone同電腦冇得用，聖誕樹想搵個裝飾品都成問題。美國面對中國最大債主、貿易國最重要夥伴，仍鏗鏘講出「安全因素」作罷買同反口，喺大是大非前，毋須向中國14億人口市場叩頭。
Captain Cool
https://www.facebook.com/seeforcaptain/
本欄逢周一刊出