澳洲組合潘頓同賀賢專於新馬賽贏馬攞威，繼上次5月22日贏21倍「鎏金驃」後，這天甫開場第一場新馬1000米直路賽，佢哋又嚟料，攜手為初出三歲愛爾蘭馬「可人兒」旗開得勝。此駒於最外欄後上一攻而破，造就潘、賀組合再次揚威新馬賽，單Win及組合獨贏A3，分別派62.5及22.5元。
「可人兒」係今年本地拍賣會首匹出賽馬，身價550萬元，馬主係鞋王Le Saunda老闆李子彬新抱李皓玲，馬兒本身似乎見水即生，好擅跑變化地咁，末段沿住外欄越衝越行，結果首次出賽即順利打響服役頭炮，亦幫埋李子彬家族打開今季勝門。
呢場新馬賽熱頭冷腳，第二名由同樣初出的「志友運」夥拍史卓豐拎到，呢匹姚廐新馬110倍全場最冷，連贏搭「可人兒」派彩4,082元。三、四名分別為大熱門「秘密武器」及另一初出馬「海翡翠」，四重彩彩336,360元。
此外，鄭雨滇頭場騎完「勝將臨門」落敗後，出現身體不適，餘下場次座騎全數換人，其中第二場「歡欣滿載」易配蔡明紹。