今屆香港國際龍舟嘉年華，一連三日喺中環海濱舉行，適逢今年係國際龍舟邀請賽40周年，大會特設「香港盃」賽事，邀請到署理特首林鄭月娥頒獎畀三甲。
噚日中午回應劉展灝離世消息時一度哽咽嘅林鄭，其後到中環海濱頒獎時已經收拾心情，為在場龍舟健兒打氣，見到健兒單手捧起「香港盃」時，更擘大個口露出驚訝表情（圖）。呢場賽事嘅冠、亞、季軍隊伍依次為：名門世家南海九江男子龍舟隊、Singapore National Dragon Boat Team及南區區議會龍舟隊。由於天氣不穩，旅發局話入場人數同預計有頗大落差。