【球圈馳騁】
碧咸，是一代球迷的男神，也是陳婉婷的偶像。由追星族到瞞着媽媽參加女子足球訓練班，又由娘子軍蛻變為冠軍球會總教練，這個港足女波牛的足球路，既平凡又不凡，小妮子說感謝父母的信任，容許她大學畢業後加入職業球會。
冒母簽名學踢波
身為曼聯迷，牛丸中一時已視碧咸為偶像，不同者除了儲相睇波搖旗仔，還迷到落場做波牛，「玩女子足球，喺香港平台唔多，初中時已想玩，阿媽唔想我去，升中四嗰個暑假又有班，結果係我冒阿媽簽名參加」。自小好動，對上還有一個哥哥，小時候媽媽為她報畫畫和跳舞班，統統興趣缺缺，反倒最愛與父兄齊齊睇波，放學後又跟男同學踢波，萬綠叢中一點紅。
「佢哋應該冇當過我係女仔！」香港無職業女足聯賽，落得場的都真正熱愛，大學畢業，她讀地理與資源管理系，最多人教書，女波牛卻選擇半職球會工作。「人工低、唔穩定，某程度確係球圈常態」。大學剛畢業，任性一下沒所謂，但年復年，難免有壓力，同學聚會，都在談升職儲首期買樓，她則在球圈馳騁，「屋企好自由，從冇畀壓力我，但做得耐，始終會擔心」。可幸努力沒白費，人生，確始料不及。
■記者呂麗嬋