女將蔣嘉琦這天好落力，為師傅呂健威的周日(12日)戰馬「喜盈豐」等駒作最後備戰，操完喺空檔時間，原本正行緊返馬房的另一位練馬師文家良，見到嘉琦即停步，冒雨企喺一旁，等嘉琦行過嚟，同佢講咗一大輪，只見嘉琦笑笑口，又點吓頭，期間更揮拳動作多多，盡顯其活潑一面，而兩人明顯在研究周日的出擊大計。
今期嘉琦將為「劍飛聲」、「帝豪寶貝」兩匹文廐馬執韁，其中第9場三班1000米直路賽之「劍飛聲」上仗轉文廐初出毫無表現，但拼後操咗近兩個月，試埋大閘磨利狀態先再出，備戰有誠意。而第10場三班1200米草地之「帝豪寶貝」更係由嘉琦新勝同程，既反映實力狀態有保證，亦證明人馬合拍，今仗升上三班只孭 108磅咁輕，文家良同嘉琦隨時又可合作建功。