當荷李活電影為人民幣服務，硬加東方元素，香港人入場就會好難受，大陸人buy唔buy呢套？真係唔知，你知啦佢哋乜都buy，包括日本廁板。
講英文的周杰倫+澳門金沙大大個logo+一堆講唔正廣東話的黃皮膚老臨+大紅燈籠高高掛的濕街市+礙眼的簇新道具中文招牌+要講兩句普通話的Hulk（我意思係Mark Ruffalo）同Morgan Freeman?你答我，違和感有幾多？
如果把這些通通減去，電影係咪上佳作品？依然唔係！嗰啲「西人視點的東方」只係怪味醬料，我哋「被沾醬」係慘啲，但出事嘅係個主菜本身，係劇本與人物刻劃。上集觀眾對炫目的魔術、騙術、催眠有新鮮感，「四騎士」用大型表演揭財團陰私及劫富幾精彩，而且佢哋總係神一般擺脫莽撞FBI Hulk（我意思仍然係Mark Ruffalo）的追捕，係有啲睇頭。雖然結局嗰下扭橋令我即刻變咗含住尤加利葉的呆掉樹熊，繼而好想在戲院仰天長嘯「唔Ｘ係啩」，個復仇計劃有無咁爆呀？不過，強調返，當娛樂大片看還算唔錯的。
上集留低咗條牽強的尾，今集要解謎可以點做？就係將扭到彎的橋企圖拗番直。到底Hulk（以下不會再解釋）點解會係四騎士的幕後操控人，電影開首就用童年Hulk睇住爸爸表演失敗的回憶切入，問題係呢段好長好長，而且個小朋友演出太老練太浮面，成段戲感染力欠奉。進而看到有點落難feel的騎士阿頭Jesse Eisenberg如何跟神秘組織「天眼」溝通、FBI高層唔信Hulk bla bla bla，悶！個頭開得唔靚，鬆散拖戲得來又未能令冇睇首集的觀眾清楚來龍去脈，追看興趣大減。
直至劇情講到有新女仔加入，才把悶爆觀眾帶出十八重迷霧。新女角Lizzy Caplan麻甩可愛，幾討好，不過硬要佢搞笑效果麻麻。負責催眠的Woody Harrelson今次要扮埋專同佢作對的孖生細佬，細佬人kai造型醜，每次佢出場，我都替Woody Harrelson尷尬，慘。細佬幫富商哈利仔Daniel Radcliffe做事，哈利仔綁架四騎士幫佢偷嘢兼報佢哋搞到阿爸破產之仇。深信科學能戰勝魔術的哈利仔演奸角有點乏力，角色有點蒼白，但佢的確引發到很多笑位，都算做到嘢。不過今集所有奸角都無乜智慧，又唔謹慎，做盡多餘事。奸角蠢，係好無癮的。
看四人如何合作瞞騙眾人混入手機發布會悅目流暢，但為了配合劇情發展，表演埋唔到尾，唔夠爽。高科技公司內偷牌互傳視覺效果唔錯，但其實經唔起推敲。走進人群的近身魔術挽回不少分數，Jesse Eisenberg的雨中幻術尤其好睇。如果Hulk懷念爸爸的情節刪減一下，搞番好啲魔術表演，已經可以保持上集的視覺效果質素。打大佬有點兒戲，不過都有丁點驚喜。結局重蹈開首覆轍，長過萬里長城。真係有必要把上集「奸角」來個180度反轉嗎？真係講得通？其實彎咗點拗都唔會直番！
《非常盜2》 (NOW YOU SEE ME 2)
導演：朱浩偉
演員：麥克雷法路、謝西艾辛堡、活地夏里遜、丹尼爾域基夫、摩根費曼、米高堅、周杰倫
評分：68分
現已上映
記者：葉青霞