11年前，法國國腳皮耶仲踢緊預備組，人工唔高，要兼職做售貨員幫補家計，但喺上周五歐國盃揭幕戰一戰成名，先送助攻，再射靚波絕殺，幫法國喺A組以2:1擊敗羅馬尼亞。皮耶風頭簡直勁過俾人吹到上天、又話係「新施丹」嘅保羅普巴。
世界波險勝羅馬尼亞
喺呢場歐國盃A組首輪分組賽揭幕戰，法國派普巴踢中場，皮耶就踢左翼，去到57分鐘終於開紀錄，皮耶傳中，基奧特頭槌破網。65分鐘，羅馬尼亞靠保丹史坦古射入12碼追平。法國焗住要換人搶攻，迪甘斯寧願換走名氣大嘅基沙文同普巴，改由京士利高文同安東尼馬迪爾入替，都堅持留皮耶喺場上，畀佢踢中路；呢個調動喺89分鐘見效，皮耶離門廿幾碼射入世界波，幫法國絕殺羅馬尼亞，首戰得勝。
皮耶呢場唔單止有入波有助攻，佢仲有五次成功突破，八次為隊友製造埋門，踢到成個施丹咁勁。英國《每日郵報》都撰文將皮耶同普巴比較，話普巴呢場表現只係過得去，有大把進步空間，至於皮耶就搶晒鏡。
迪甘斯斥普巴冇料到
效力英超韋斯咸嘅皮耶賽後開心到喊，好感嘆咁話：「如果有人之前話我知，今晚（上周五）嘅故事係咁樣，我肯定唔會信。」至於迪甘斯除咗大讚皮耶射得靚，仲明寸普巴：「我對普巴嘅要求又唔係高，但明顯睇到，以佢嘅能力應該可以貢獻更多。」迪甘斯講到出聲，希望普巴之後生生性性啦。
講番皮耶，都算係歷盡艱辛，大器晚成，今年已經29歲。佢喺勒哈弗爾青訓出身，但球會唔畀職業合約佢。其後佢頂硬上，喺球壇繼續捱，輾轉效力過南特，但嗰陣只係多數踢預備組，人工唔高，佢喺05年更試過兼職做售貨員。捱過咁多苦，就嚟去到三字頭，終於喺國家隊出人頭地，真係唔怪得佢激動到喊出嚟。