上周六進行另一場歐國盃分組賽A組賽事，瑞士對阿爾巴尼亞。呢場波焦點之一係沙加兄弟各為其主對壘，成為歐國盃歷史第一場波，親生兄弟「煮豆燃萁」，結果細佬格列沙加嘅瑞士技高一籌，1:0小勝阿爾巴尼亞全取三分。
格列沙加同佢大佬杜倫沙加都係喺瑞士出世，前者一直代表瑞士國家隊，但杜倫就中途「轉軚」去咗效力阿爾巴尼亞。其實瑞士仲有其他國腳好似梳頓沙基利同比哈美等，有阿爾巴尼亞或鄰國科索沃血統；阿爾巴尼亞都有阿積迪同希沙積等係喺瑞士出世，呢場波可以稱之為大混戰。
講番場波，論實力無疑係瑞士高過阿爾巴尼亞，佢哋亦喺開波五分鐘就先開紀錄，沙基利開出角球，對手門將伊列比利沙出迎慢一步，瑞士中堅法比安舒哈接應一頂入網。踢到36分鐘阿爾巴尼亞再受打擊，中堅兼隊長簡拿用手解圍領第二面黃牌，出現今屆歐國盃第一張紅牌，雖然大部份時間踢少個嘅阿爾巴尼亞，表現仍然唔錯，但最終以0:1輸波。