歡樂時光過得特別快，又係時候講拜拜！唔經唔覺，做咗3年美國駐港總領事嘅夏千福要走喇，噚日美領館喺fb宣佈，夏千福做埋下個月就離任，由唐偉康（Kurt Tong）接任。
將於8月履新嘅唐偉康出生於俄亥俄州，麻省長大，做過美國國務院經濟及商業事務局首席副助理國務卿，係國務院處理經濟事務最高級嘅職業外交官，去年11月佢來港講TPP（跨太平洋夥伴協定），今年3月亦同當時嘅候任台灣總統蔡英文見過面，更加做過美國駐亞太經合組織嘅大使，識講普通話同日文。
唔少網民噚日一知道呢個消息，都喺美領館嘅fb專頁留言話唔捨得千福BB。查實千福BB前日先至po過畫龍點睛同食糭相片。唔知唐偉康係咪一樣咁鍾意落區或者體驗香港文化呢？
