歐國盃啱啱開鑼，東方教練「牛丸」陳婉婷同門將葉鴻輝噚日喺開鑼前夕，應歐國盃鐘錶贊助商出席宣傳活動，牛丸話睇好主隊法國捧盃；至於英雄輝就撐德國攞完世界盃，再捧歐國盃，不過，佢又話唔好睇少英格蘭，因為有哈利卡尼同占美華迪，呢兩位當弗前鋒。
前日先至喺沖繩度完假返港嘅牛丸話，法國今屆有主場之利，三線人腳當打，前線又有佢最欣賞嘅基沙文，照計有機會可以喺主場捧盃。呢位人氣女教練稍後會同家人去北海道自駕遊，返嚟就會飛去法國為樂視做直擊。英雄輝聽日就飛去大阪旅行，之後再去蒙古，不過，佢會繼續留意佢兩支心水球隊德國同英格蘭喺歐國盃踢成點喎。