歐國盃開波，曾經水火不容嘅兩大名宿比利（右）同馬勒當拿（左）都走埋一齊，周四喺巴黎一場由歐國盃贊助商搞嘅五人足球賽，擔任兩隊教練。希亞路、施多夫同簡拿華路等昔日名將都有參與，老馬仲一時技癢落場踢幾腳㖭。表演賽以「友誼」作口號，佢兩老都有響應，賽後冇針鋒相對，老馬仲話好多謝比利，話球壇確係需要呢類咁有代表性嘅人物。