在香港上映的韓國電影真係向左走向右走，講男主角，一係女人AV咁極致夢幻，畀雌性動物食鮮肉放題，然後不忍重回沒有靚仔又戇直兼對你死心塌地oppa的現實；一係就奉俊昊、朴贊郁嗰種黑色變態到你好想快啲重回無咁兜口兜面式恐怖的現實，精神分裂喎大佬。
《原罪犯》、《親切的金子》、《飢渴誘罪》導演朴贊郁到底係咪殺過人？到底要有幾變態先拍到嗰啲作品？其實變態只是表象，底蘊係溫柔，唔黑點知白好？朴大導新作《下女誘罪》早前驚艷康城，各地影評大讚，成功賣埠176個國家，成為賣埠成績最佳的韓國電影。「下女」即女僕，這個詞令人想起同鄉全度妍主演的《下女》，兩套電影都聚焦女僕及主人的情慾糾纏，可是今次的主人是女主人。電影改編自英國小說家Sarah Waters的作品《荊棘之城》(Fingersmith)，描述千金小姐和受僱於冒牌貴族的女僕之間的故事。導演把故事背景從原來的維多利亞時代改成日治時代的朝鮮。人性的扭曲，道德的崩壞，不見血，低調殘酷，反而令人最寒最慄。6月30日香港上映。
記者：葉青霞
