中國外長王毅在加拿大向加拿大女記者發爛渣，全無外交家風範，返到北京，唔知道國務委員楊潔篪會唔會教訓吓佢？中國外交部長從政府退休後，得寵嘅就會做中央外事工作領導小組秘書長，兼國務委員，以前錢其琛、唐家璇，皆是如此，即係中國外交系統最高級之人，外交部長要聽佢話。楊潔篪曾留學英國巴斯大學，倫敦政經學院，與美國兩位布殊總統有私交，對付外國記者一定好過中國土產畢業生王毅嘅。
不過查翻資料，王毅外父錢嘉東曾經做過周恩來嘅外事秘書及駐日內瓦聯合國大使，王毅點解學唔到一啲外交辭令呀，是否資質不及還是發揚中國「有錢便任性」嘅作風？想當年，周恩來被外國記者問及：「中國有沒有娼妓？」問得幾直率，亦富挑戰性，據講周恩來即刻答：「有，在我們的台灣省。」正是連消帶打，語帶風趣，邊度駛黑起塊面咁講：「你有冇到過中國……」
有錢便任性，隨時可扼殺言論自由，王毅在加拿大嘅表現，本質上係壓制言論，問都唔俾你問呀，鬧你一餐先，恃嘅係乜，咪係中國是世界第二大經濟體系，中國富翁／中產，一人到加拿大買一間屋，都可以炒起全個加拿大大城市嘅屋價囉！最近美國矽谷億萬富豪Peter Thiel因為憎厭一個矽谷八卦網站Gawker揭發佢係「基佬」，就用私人錢聘請一隊律師去搵Gawker揭露過嘅「主人翁」慫恿呢類人出頭控告Gawker，要求賠償，卒之搵到一位職業摔角手Hulk Hogan（綽號），真係告到Gawker飛起，初審大獲全勝，法庭判Gawker要賠一億四千萬美元，即使上訴後獲得寬減，呢間網站都怕要執笠啦！Peter Thiel係PayPal創辦人兼fb第一批投資者，有錢到唔恨，新聞網站同佢打官司，即使唔駛輸，淨係律師費都可以令網站破產。美國新聞界一致反對Thiel有錢大晒，用錢嚟壓制言論自由，扼殺傳媒。其實呢招係舊招，以前英國傳媒大亨Robert Maxwell（1991年浮屍大西洋後，被查出偷公司錢，出版王國破產）在80年代最鍾意控告他人誹謗，阻嚇其他傳媒唔敢揭露佢嘅醜聞。打官司求公義喎，在資本主義社會，公義無錢便不得彰顯，大有錢人可以「樂此不疲」，傳媒邊敢亂說亂動呀，Peter Thiel顯示了金錢威力，王毅實際上亦係以中國大把錢嚟嚇西方記者而已。