青年民建聯一班領導層，噚日喺黨總部同傳媒茶敍，透露過去一年搞咗成250個活動畀年輕人參加，包括上年歐聯決賽包場睇波、邀請「男神」劉鳴煒、「白宮發言人」馮煒光等人分享嘅「名人飯局」等。
佢哋嚟緊仲會破天荒搞兩場喺將軍澳泳池舉行嘅潛水班，32個名額已迅速爆滿，難怪青年民建聯過去一年多咗231名會員，至今已有1,575名，主席顏汶羽形容工作算「合格」。
咁一年搞成250個活動要用幾多錢？顏汶羽話冇計過，但話有時都會收回參加者費用，包括嚟緊7月10日再辦嘅「名人飯局」。
呢個飯局有乜特別？原來青民請咗最近爆出「宗割特瘜」醜聞後鞠躬道歉嘅譚Sir譚耀宗做嘉賓，唔知譚Sir屆時有乜嘢同大家分享？