上月大事，不能不數尖東忌廉哥暫別江湖。這隻肥貓絕對可稱為元祖級寵物店長，率先帶起大家留意店內寵物的狂熱，告別當日就吸引了眾多貓奴和記者貼身直擊過程！各位粉絲唔好喊喇，這些吸睛的寵物店長其實區區都有，而且多到梗有隻喺你左近，牠們在自己地頭的人氣更是直逼忌廉哥。我們將一連三日和大家探訪各有獨特脾性和習慣的明星店長，包括樂富眼鏡哥、西環林子祥、西營盤出走貓，以及長洲島上一對會聽指令的貓兄弟等等等等……當中沒有閣下的心水？我們歡迎你即刻click入果籽的facebook (https://www.facebook.com/AS.AppleDaily/)，連相帶字分享心目中最把炮的寵物店長！
樂富眼鏡哥──Billy
第一站，我們近近地，來到樂富一間已有三十多年歷史的眼鏡店，探一隻戴眼鏡的貓。Billy今年11歲，接近20磅，興趣唔使講都知道是食。說時遲那時快，Billy跟老闆娘梁國怡已急不及待進行一場叫「你推我拉」的表演。老闆娘先將Billy引到牠的食物碗前，將碗推入櫃底，不出兩秒肥仔Billy已經會不耐煩地將碗拉回自己前面，萬試萬靈的。咁得意，有不少街坊會變身龍友狂影Billy，有些就會畫畫、有些則會年年也整本Billy月曆自用，有人更自製眼鏡送畀Billy戴起做生招牌。對了，不得不說這隻大明星還有私家修甲師的！同區當髮型師的Jimmy，過去5年一直定時定候來為Billy剪指甲和修毛。行性格路線的Billy會收起平日cool樣，倒在梳化上任由Jimmy搓肚。老闆娘就提提大家，大明星每日11時至2時最活躍，然後就開始瞓覺喇。
尋Billy：麗晶眼鏡 樂富廣場3樓3133D舖
貪戀時裝的貓──蛋蛋
大角嘴有隻每日都扭計，要走過隔籬時裝店流連的蛋蛋。牠來自大角嘴一間維修水電冷氣的小店，內裏有6隻由老闆娘譚少卿飼養的貓店長，不過有時又會多幾隻，全由老闆娘幫手照顧，等待尋家的貓咪。這裏貓多，很多時門口會站着數個撩貓玩的人，有些甚至會走入內，純粹玩貓。這裏的貓都曾經是小流浪，又或是街坊贈送，當中1歲的散步貓蛋蛋，是街坊買完玩完棄養的。短腳的牠喜歡到隔籬舊式時裝店玩，偏偏時裝店老闆娘疑對貓毛敏感，「不過有時見到蛋蛋在門外看我的眼神，就會很不忍心。」這天時裝店老闆娘就破例，忍受着敏感皮膚的不適，讓蛋蛋入來玩。
尋蛋蛋：順興水電冷氣工程 大角咀嘴大全街27-31號地下C舖
記者：許政
攝影：伍慶泉
