禮拜日沙田八草三泥賽事，草地用C跑道，天文台預測有狂風雷暴，極有可能在變化地作賽。睇番4月10日同一移欄賽事跑好至黏地，當日前置馬仍然較佳，例如「好友心」、「至尊飛星」及「閃電王」放頭帶到，後駒更加沿途走外叠仍捱到返終點，可見外叠唔蝕底。不過當日尾三場頭馬「紅海灣」、「好易搵」及「再出奇」均後上贏，提防尾段場次形勢會逆轉。
今戰列陣馬中，四場「至尊飛星」三次跑田C欄1200米均非冠即亞，贏馬一役正是於4月10日所得，今仗配蔣嘉琦可重施故技。另外，五場「天外之天」不論田C欄及變化地均有過贏馬紀錄，趁地淋可放到。
至於泥地方面，今季11場濕泥賽事，當中六場由守頭兩位馬匹勝出，二場「元豐泰」、六場「故事」及七場「步步領先」等擅跑泥地之快馬可優先留意。