ViuTV實況選美節目《美選D.n.A.》昨日舉行面試，是次節目不設年齡上限（16歲以上可報名）、不設婚姻限制、不設學歷限制，以魔鬼（Devil）與天使（Angel）為主題，昨日一共有11個人面試。
最後生嘅「候選佳麗」黃嘉儀僅19歲，係一名中學學生，佢話今次參選想搵番信心同自重感，問佢平時係唔係好冇信心，佢就話：「唔係!不過想自己再好啲，今次參選都係自己決定。」怕唔怕學校方面有問題，影響學業?佢就話：「會plan好啲個時間表，因為機會係留畀有準備嘅人。」
至於最年長嘅「候選佳麗」就係42歲家庭主婦及撰稿員Vanessa，佢就話貪得意嚟參與：「佢(ViuTV)冇年齡限制、冇婚姻限制好得意，我結咗婚，有一個8歲大嘅囝囝，囝囝就唔知發生咩事，不過老公就好支持，老公一直都支持我做任何我鍾意嘅嘢。」講到佢覺得自己有咩優勝之處，Vanessa稱：「我都唔知有咩準則，又天使、又魔鬼!」Vanessa笑住講自己平時對住囝囝就係天使，對住老公就係魔鬼，所以兩樣都得。
咁有冇準備啲咩嚟見評判?Vanessa直言：「佢哋只係叫我帶身份證同護照嚟影印，我自己都冇諗會入圍，以前廿幾歲選過校花，係同李璧琦嗰屆，李璧琦拎咗冠軍，我就因為有啲原因退選咗。」