天有不測之風雲，這天第二場賽後，快活谷馬場受暴雨影響，場地多少起咗變化，結果第三場四班1000米「實力飛駒」呢匹1.9倍全日擂台躉，大熱倒灶屈居亞軍，頭馬是9.8倍之「炸魚薯條」。
「實力飛駒」配潘頓起步迅速，沿途居內欄吊住放頭馬「歡喜」守第二位，直路順勢移出望空，睇當時個勢贏硬收少個崩都唔制，點知衝落喺佢外側的另一匹前置馬「炸魚薯條」仲勁，雨水冇將薯條淋濕，呢匹由李易達訓練之五歲馬，在楊明綸胯下彈甩「實力飛駒」個多身位掄元，單Win及組合獨贏A2，分別派98.5及34.5元。
「炸魚薯條」馬主蔡曼恩與丈夫前騎師嚴顯強，賽後冒雨拍拖拉頭馬，此駒繼季初贏田草直路賽開齋後，今次打開埋谷戰勝門。反觀「實力飛駒」跑盡都係第二，繼上仗後再一次做二奶，未能重開勝門。
今場杜利萊策「創意寶」後追第三，第四名落在冷門黃皓楠「故事」身上，四重彩派二萬六千幾。其中杜利萊頭三場全上名，分別係「傾心星」(第一)、「飛霞」(第二)及今場「創意寶」(第三)。