越來越多三、四字頭嘅富二、三代接班，睇番各大企業最新年報，發現最高人工嘅，係近年業績麻麻嘅利豐（494）太子爺、2014年先做行政總裁嘅馮裕鈞（Spencer），舊年袋走313.6萬美元（約2,446萬元）呀。
而令到新世界發展（017）表現漸入佳境嘅第三代接班人鄭志剛，都只能夠屈居第二，不過佢年薪同樣過二字頭，收2,170萬元。鄭志剛堪稱八足咁多爪，同時打理K11、周大福（1929）等，呢個人工算合理喇。
值得一提，當然係出名堅離地嘅靚package，華置（127）主席劉鳴煒舊年年薪1,422萬元，呢個數目，環遊世界好多轉都得。但講番轉頭，富二、三代坐擁過千億元商業王國，過千萬年薪又算得係乜吖。