上周六因為家人生日聚會，缺席咗維園一年一度嘅晚會，感覺當然失落，更傷心係睇見香港年輕人對六四嘅態度。無可否認，六四喺27年前發生，十幾二十歲後生仔冇親身經歷，難免對呢個慘劇冇咩感覺；但六四始終係香港上一代人嘅心結，去晚會被取笑為「大中華膠」我都可以忍，後生仔上台搶咪就真係講唔通。
「大中華膠」、「左膠」呢啲字眼，喺佔中後被廣泛利用。講真，有啲理想主義左翼分子嘅政策又係幾不切實際，好似英國有啲名校要特別加開配額畀少數民族學生入讀，叫做公平主義喎，倒番轉咪又對勤力讀書嘅白人學生唔公平？今屆歐國盃決賽周擴大到24隊，呢個前歐洲足協主席柏天尼自以為嘅德政，其實都係「左膠化」；外圍賽得53隊參加，有23支入決賽周（仲有主辦國法國），晉級機會竟然高達43%，真係有少少實力都入到決賽周，除咗真心抵死嘅荷蘭。結果造就咗冰島、阿爾巴尼亞等以往三、四線球隊參與，但佢哋真係唔夠班。
要揀隊黑馬，小弟信波蘭。講波蘭，大家都一定識羅拔利雲度夫斯基，羅拔仔今季大熟大勇，拎到德甲神射手，盛傳皇馬想買，拜仁堅持唔放就證明有料。不過，波蘭唔係單天保至尊，門將施捷斯尼、後衞比薛斯基等都係好嘢，雖然C組有「惡老虎」德國，但兩國關係密切，德國放分都唔奇，至於北愛同烏克蘭都易食。有統計話歐國盃隔三屆就有冷門隊入決賽，1980年比利時攞亞軍，1992年丹麥同2004年希臘仲爆冷奪冠。又過12年，波蘭係咪另一支入決賽嘅冷門隊呢？
文：牽牛