近年內地演藝圈盛行小鮮肉，82年憑拍《天龍八部》段譽一角成名的湯鎮業，當年亦只不過25歲左右，是名副其實的小鮮肉一名，他說收工時在大台門外，會有fans等你要求拍照及簽名，他說：「咁𠵱家當然犀利好多，冇得恨嘅，冇得咁諗返轉頭。」
不過阿湯的一對孖仔君慈和君耀，就極有可能成為星二代，阿湯說：「佢哋今年22歲，喺美國UCLA大學讀緊經濟，一個鍾意健身，一個鍾意追女仔，都幾靚仔又夠高，啱晒小鮮肉條件。有興趣咪畀佢哋試吓。」阿湯表示當年供一對孖仔及長女愛嘉到美國升學時頗吃力：「嗰時家姐已經喺UCLA讀緊傳播系，我同孖仔講如果讀唔到或者野雞大學就唔好讀，因為你老竇唔係成龍、劉德華，拍一部戲有幾千萬，好在佢哋都生性。」