這天端午節正日，快活谷唔係扒龍舟而係跑日馬，一開場第一場四班1200米，就見到練馬師方嘉柏呢位谷草日賽專家建功。
今場方嘉柏將上次配湯智傑喺三班落第的「傾心星」，交由愛將杜利萊降班上陣，結果呢個部署冇令馬迷失望，「傾心星」早段守內欄中間位置，直路移出外叠一衝過晒，三歲澳洲自購馬初跑快活谷即獲在港首捷，單Win及組合獨贏A3，分別派70.5及32.5元。
睇番紀錄，連同這天方廐於最近17次谷草日賽15次有馬贏，而由今年3月至今呢個馬房所有頭馬均在谷草勝出，沙田超過三個月冇馬贏，至於杜利萊剛周日爆完鄭廐「好腳頭」後，這天再有進賬，保持停賽復出未斷纜。
呢場由一對內檔馬串Q，3檔「傾心星」贏，2檔「威龍」夥拍楊明綸後上第二，第三名由冷門「勇勝王」拎到，鞍上人寶遜依然未開齋，第四名則係柏寶座騎「八運」，四重彩派六萬六千幾。