正當大台仍沉醉在大氣電波收視的迷思，殊不知現今社會已發展到阿公、阿婆都懂得上網，人人上網看劇的年代，官媒都認為大台「不再唯一」，出身無綫的湯鎮業亦有同感。他在《天龍八部》中演的段譽，曾迷倒不少少女，今日回首他卻不喜歡看香港電視。早前回巢拍劇的他，認為電視生態已翻天覆地有改變：「有點擊就有廣告。」
撰文：何永寧
湯鎮業早前為宣傳電影《夢想合伙人》接受本報專訪，他自言片中戲份其實很少：「不過做演員其中一個責任就係幫手宣傳，戲多戲少都要做。」始終上一輩的演員那份敬業精神，是當今娛樂圈所缺少。
不愛看電視
近年長居內地，身為廣東省政協委員的湯鎮業出身自大台的「五虎」，對上一次拍香港劇是無綫劇集《梟雄》，他笑言沒有完整看過一集：「我都唔鍾意睇香港電視，好奇怪吓話。鍾意睇真人騷《我是歌手》、《中國好聲音》，香港劇每況愈下唔好睇，冇製作。𠵱家韓劇咁犀利我都冇睇。」阿湯表示公平點說，自己是一直以來都沒有追看劇集的耐性，曾幾何時木村拓哉的經典日劇《悠長假期》，都只是看兩集便收工，已經是阿湯看劇集最長的紀錄。
當年拍落的《天龍八部》等劇，阿湯都是拍完就算：「講你都唔信，本身唔鍾意睇電視，做電視係搵食，冇呢個癮。」他以旁觀者分析電視大戰：「打仗係必然，不過香港點打都冇用，市場太細冇製作，𠵱家全民喺網上睇電視。香港人才好多，但好浪費，係冇機會畀佢哋發揮。」
阿湯透露現在製作生態跟當年在大台時，已完全不一樣，他說：「TVB你真係笑死人啦，唔可以好似以前咁玩，要返內地行吓，睇吓人哋電視台點做節目。拍一個真人騷一隊crew都二、三十人，拍《跑男》（《奔跑吧兄弟》）一集啲星都收幾百萬，TVB紅極嘅藝人拍一套劇都唔夠人一集嘅錢啦。」早前拍劇後，大台欲找阿湯添食：「我話十零廿日就冇所謂，你話拍幾個月就唔好，畀唔到錢。」
拜服韓國人
近年內地是小鮮肉的世界，阿湯透露是順應廣告生態，他說：「因為有話題，啲𡃁仔𡃁妹會講，同埋𠵱家拍劇唔係賣電視台，係賣網站，講緊點擊係幾十個億，有點擊就有廣告。」阿湯又補充說：「以事論事，以前好出名啲一線演員陳寶國、陳道明、張國立都坐晒喺度，太貴同唔興。」他笑言現今𡃁仔𡃁妹在微信、網上討論的不外乎都是韓國男團EXO的前中國成員鹿晗、吳亦凡。
另外，執導阿湯的《夢》片導演，正是大熱韓劇《來自星星的你》的張太維。提到跟韓國人合作，他表示極度拜服，一個民族成功是有原因，並不會是偶然：「同導演溝通都係透過繙繹，不過唔到你唔服，成班韓國工作人員好有紀律，食完飯排隊去廁所，原來係攞牙刷去擦牙，除咗注重儀容，亦都係公德。」