當大家睇緊呢篇文時，越野兔已經身處西班牙小島，爽歪歪地度假。對於自助旅行，都有唔少心得可以分享，今日就想介紹歐洲版「泥鯭的」，又可以叫私家車版的AirBnB，共享旅途平台BlaBlaCar。
BlaBlaCar是一個網上平台，旅客可以在平台上找到路線相同的車主一齊上路，少少似進化版的hitchhike（截順風車），不過世上無免費午餐，車主會按照其車款、舒適度等自訂一個價錢，主要都是分擔吓油錢，相對於動輒過百歐元的火車飛，又或者兜路的長途巴士，BlaBlaCar都只是十幾廿歐元，相對抵玩。
如果你擔心安全問題，BlaBlaCar與AirBnB一樣有評分制，仲有「女性專用功能」。另外車主或乘客都有個簡介，除了基本資料及認證外，亦都要講明自己有幾吹得，例如「BlaBlaBla」即係唔講嘢會死；「Bla」就係你畀我專心揸車啦；如果你去旅行鍾意識朋友，周圍頴水吹的話，BlaBlaCar絕對可以讓你傾個痛快。
越野兔就試過用BlaBlaCar，由捷克一個小鎮返去維也納，司機是20歲捷克後生仔，同車還有一個台灣女生，3個人傾足4個鐘，由旅遊、政治、經濟咩都傾一餐，簡直是深度文化交流，好不愉快。
有時旅行唔係講睇幾多風景，食幾多好西，反而旅程中與其他人相處的時光，永遠是最難忘深刻。
越野兔
本欄逢周五刊出