立法會選舉臨近，唔少政圈中人噚日都趁端午節喺fb呃like，民記主席李慧琼唔執輸，上載一條名為「團結一心奪錦標」動畫（圖），片中「番民隊」喺比賽偷步，包尾嘅「勇武隊」使出「殺（撒）手撊（鐧）」，向領先嘅「團結隊」掟糭，其間「番民隊」只顧食花生，仲幫手為「勇武隊」打氣，最終「團結隊」從後居上獲勝。
琼子段片上載咗幾粒鐘，瀏覽率只有千幾人，同佢黨友「Tree根」完全冇得揮，「嬲嬲」多過like，有網民仲寸琼子好似梁振英，「嘴巴講團結，手裏在打其他派別」，唔知琼子有冇諗過搵「Tree根」位「根毛毛」救亡，幫手谷吓人氣?