好亂呀！代理行指樓價回升只是錯覺，大跌趨勢未改；又有券商話樓市要到2018年先至減辣，家陣起碼再要跌四成，咁咪代表唔好現在買樓，買樓正傻仔。
買樓係咪傻仔好難定案，當年沙士年和海嘯年都有人買樓，那時也有不少評論樓價短期翻身難，結果事後證明說傻仔反而是傻仔，樓價大升令到好多人跌眼鏡，連多年經驗的行內人亦大嘆好難分析，始終樓市好個人，有需求便會買，懶理升市跌市。
至於是跌市中買，抑或是升市中買則要自己負責番，越買越跌、錯失升市那不必要怪任何人。
最慣性的常態反而是越跌越冇人會買，若果看到會跌的話便不會有成交，縱使沙士時最差的一個月也有近3,000宗成交，他日這便是最精明的買家；至於高位追貨的買家，也不要常常自責為何那麼不智，只要拿作自用、有正常工作收入以供樓，又為何懼怕入市。
投資市場不怕牛市、熊市，最怕牛皮市，所以今年首兩個月便出現上述情景，冇人敢買，令到成交量慘過沙士。眼見發展商減價賣樓，同時透過高按或其他回贈方式谷銷情，個別原本睇定啲的潛在買家出番嚟買樓，反映了市底並不是太差，叫人不賣樓的人無疑阻人發達。
大嗱嗱幾百萬元不用他人代決定，去問黃大仙吧！若果自己冇判斷那就不如唔好買。
劉兆昌
資深地產傳媒人
http://www.HKLau.com
本欄逢周五刊出