幾時都話騰訊（700）老闆馬化騰，最了解內地機迷嘅心理，由暴雪（Blizzard）於2004年推出嘅「神Game」《魔獸世界》，加埋之後不斷推出嘅擴充版，成為大批「80後」學生一放學就會玩嘅網上遊戲，已經成為咗一代嘅記憶。
終於，神Game嘅故事同埋角色，過咗12年終於靠王健林旗下傳奇影業同埋騰訊，成功搬到上銀幕，套戲名叫《魔獸爭霸：戰雄崛起》。
雖然有啲人話睇唔明故事，加上靚仔吳彥祖俾CG同特技改到認唔出係佢，搞到上畫前啲人都對呢套戲感覺麻麻，不過內地始終有一大班「死忠」，去緬懷佢哋嘅「那些年」。
據聞，以前玩開《魔獸》嘅成員組晒隊，甚至cosplay唔同種族嘅人一齊去睇戲，大大聲嗌「為了部落！」、「為了聯盟！」就係為咗諗起當年坐喺電腦面前，同老死一邊打機一邊傾偈嘅時刻。
結果，《魔獸》喺內地上畫未到兩日，票房就有5.75億元人仔，即刻成為票房冠軍。騰訊又贏！