特首選舉年底開跑，政壇天天刀光劍影，連放假都暗裏批踭。民望係咁上嘅財爺曾俊華噚日去西貢為龍舟賽主禮，佢喺活動後例牌上載相片呃like，寫咗句：「賽龍奪錦，力爭上游！」好多有心人一睇，難免諗咗去選特首，難怪有人回覆：祝早日奪錦、力曾上游。
社記送「賤糭」要求審朱經緯
大家應該記得梁振英2012年以689票當選特首一刻，喺台上舉手致謝嗰一幕。噚日鬍鬚曾喺龍舟賽同健兒們打氣時，喺「力爭上游」旗幟飄揚下揮手，畫面似曾相識，睇嚟鬍鬚曾已準備就緒，幾時「落水」就真係佢先知。呢位署理特首睇嚟好受歡迎，咁又係嘅，當一位官員落區時唔使俾人由頭噓到落尾，能全身而退，係爽嘅！
大時大節，場外示威點少得！社民連梁國雄、吳文遠、黃浩銘、曾健成噚日去到現場，搞咗個「九大賤糭 屈完及屈 追究責任 起訴黑警」示威，高喊「狼英黑警 九隻賤糭」，矛頭直指梁振英、「手臂延伸」朱經緯同七位黑警。社民連要求即時起訴朱經緯，仲炮製咗紙做「賤糭」，要求政府接收。財政司司長政治助理羅永聰就代表鬍鬚曾接收九「賤糭」。
鬍鬚曾今日暫時結束署理特首嘅日子，由於梁振英噚日宣佈佢又放10日大假，鬍鬚曾將於明日、同下周三起一連五日，再「坐正」做署理特首。未來10日，沒有梁嘅「苦」日子，大家好好珍惜。
李八方
mailto:[email protected]