靚女張玉珊創辦嘅修身堂（8200）幫人纖體美容，做到街知巷聞，最近忽然動作多多，早前供股集資過億元，上月斥資4,100萬元買入尖沙嘴幾個商廈單位，最近做埋放數生意，仲做咗一單大額借貸，貸款2,000萬元畀一名豬肉商。
修身堂之前供股集資過億元，都有提過計劃將部份資金撥去做證券投資，仲有放數業務。據聞，佢哋一個多月前先至取得放債人牌照，即刻做咗幾單生意，不過之前嘅貸款金額細，唔使披露，今次借錢2,000萬畀豬肉商先至正式公告天下。佢哋借呢筆12個月無抵押貸款，年息12厘，利錢不俗啊。
講番修身堂之前單供股，供股認購不足，只得22%認購左右，大部份供股股份由包銷商包銷，主席張玉珊嘅持股量由16%，攤薄至8%左右，唔知將來地位有冇變動呢？