噚日係端午節，各政黨梗係例牌使出「蛇齋餅糭」個「糭」字聊表心意啦，選舉就快殺到吖嘛。積極考慮喺九龍東出選嘅公民黨譚文豪，噚日唔派糭，改為「派電」。何解？九龍東嘅秀茂坪曉光閣及曉明閣，近日因電錶房火警搞到停電缺水，兩幢大廈520戶冇電用，譚文豪帶埋發電機（圖），去到曉光閣、曉明閣外面，免費提供電源，讓居民可以叉叉電。
飛機師譚文豪向來都係引擎專家，涉及引擎嘅牌照，全部都一take pass，所以發電機點會難到佢呢？難怪譚文豪hashtag「#iLove引擎」。佢仲要紮晒馬開檔，睇嚟入型入格。唔少網民疑惑，該區嘅民建聯區議員去咗邊喎？