去年話「終極退休」嘅「國際大鱷」索羅斯近期又身痕，出山大搞沽空。不過，學已故德國股神科斯托蘭尼（Andre Kostolany）話齋，沽空易令人唔開心。既然係咁，除咗跟索羅斯買黃金避險之外，惟有跟佢買民主黨總統候選人希拉莉贏美國總統大選。
索羅斯不嬲係希拉莉嘅超級粉絲，喺今次美國總統選舉中，索羅斯就捐贈700萬美元畀希拉莉，仲幫手抨擊共和黨總統候選人特朗普「衰口臭」。
其實睇番牌面，希拉莉今次好難輸。首先，根據最新民調，希拉莉嘅支持率拋離特朗普逾10個百分點。另外，特朗普以口不擇言及思維奇怪聞名全球，好難相信美國人選呢位「狂人」做總統。雖然希拉莉都唔受歡迎，又有誠信問題，但美國總統奧巴馬話，呢啲只係小問題，所以買希拉莉贏美國總統係冇錯嘅。
講開又講，希拉莉係一個愛講原則及性格強硬嘅女人，喺南海問題上又持鷹派立場，如果佢做咗美國總統，中國恐怕更遭圍堵，前景難以令人睇好。
難怪索羅斯之前不斷唱淡中國，因為佢已經買咗希拉莉贏。
雲斯頓
本欄逢周五刊出